ភ្នំពេញ៖ ប្រទេសជប៉ុនបានផ្ដល់ជំនួយជាង ៤លានដុល្លារអាមេរិកសម្រាប់ការអភិវឌ្ឍគម្រោងទទួលថាមពលកើតឡើងវិញប្រកបដោយបរិយាប័ន្ននៅតំបន់ជនបទ និងគម្រោងពង្រឹងតម្លាភាព និងគណនេយ្យភាពនៅរដ្ឋបាលមូលដ្ឋានតាមរយៈការចូលរួមពីប្រជាពលរដ្ឋ។

ការប្រកាសផ្ដល់ជំនួយនេះធ្វើឡើងនៅទីស្ដីការគណៈរដ្ឋមន្ត្រី ក្រោមអធិបតីភាពនាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងនាយករដ្ឋមន្ត្រីជប៉ុន លោក គីស៉ីដា ហ្វូមីអូ។

ក្នុងជំនួយជាង ៤លានដុល្លារនោះមាន ១,៧លានដុល្លារត្រូវអនុវត្តន៍លើគម្រោងទទួលបានថាមពលកកើតឡើងវិញ និង២,៦លានដុល្លារត្រូវផ្ដល់ទៅគម្រោងពង្រឹងតម្លាភាព និងគណនេយ្យភាពនៅរដ្ឋបាលមូលដ្ឋានតាមរយៈការចូលរួមពីប្រជាពលរដ្ឋ។

គម្រោងទាំងពីរនេះអនុវត្តន៍ដោយកម្មវិធីអភិវឌ្ឍន៍សហប្រជាជាតិ UNDP ប្រចាំកម្ពុជា។

ការផ្ដល់ជំនួយនេះគឺក្នុងពេលដែលនាយករដ្ឋមន្ត្រីជប៉ុន លោក គីស៉ីដា ហ្វូមីអូ ធ្វើទស្សនកិច្ចផ្លូវរដ្ឋរយៈពេល ២ថ្ងៃនៅកម្ពុជា៕